बुटवलमा बन्दैछ ४० किलोमिटर लामो चक्रपथ - DoroNepal

Breaking

Wednesday, June 5, 2019

बुटवलमा बन्दैछ ४० किलोमिटर लामो चक्रपथ

See the source image
२२ जेठ, बुटवल । बुटवलमा ४० किलोमिटर लम्बाइको चक्रपथ निर्माणले तीव्रता पाएको छ । बुटवल उपमहानगरपालिकाले ऐतिहासिक सम्पदा जितगढी किल्ला, पुरातात्विक शहरका रुपमा विकास गर्न लागिएको पुरानो बुटवल हुँदै तिनाउ र दानव नदी वारीपारीका सबै क्षेत्रहरुलाई सडक सञ्जालमा जोड्ने लक्ष्यसहित चक्रपथ निर्माण गर्न लागेको हो ।
बुद्धबल्लीको जितगढी हुँदै लुम्बिनी तथा भैरहवा विमानस्थलसम्मका सीधा सडकहरु र आन्तरिक बाइपासहरुलाई पनि जोड्ने गरी चक्रपथ निर्माण भइरहेको बुटवल नगर प्रमुख शिवराज सुवेदीले बताए ।‘आउदो दशैंसम्ममा नगर बस सञ्चालन गर्नेगरी चक्रपथ निर्माणको काम चलिरहेको छ,’ सुवेदीले भने, ‘चक्रपथमा हरियालीसहितको पदमार्गसमेत बनाउने योजना छ ।
चक्रपथको पहिलो चरणको कामका लागि ५० करोड लागत अनुमान गरिएको छ । नगर यातायात गुरुयोजना भने कम्तिमा डेढ अर्ब बराबरको छ । चक्रपथको हालसम्म ३० प्रतिशत काम पूरा भइसकेको र ट्रयाक खोल्दै पिच र ग्राभेलका काम चलिरहेका छन् ।
करिब १२ वटा कल्भर्टमध्ये अहिलेसम्म छ वटाको निर्माण पूरा भइसकेको छ । दुई ठूला नदीमा पुल निर्माण भइसकेका छन् भने सेमलारमा पुल निर्माणको काम चलिरहेको छ ।
कम्तीमा दुई वर्षभित्र चक्रपथ निर्माण पूरा गर्ने गरी काम भइरहेको उपमहानगरका योजना प्रमुख वरिष्ठ अधिकृत इन्जिनियर सुमन श्रेष्ठले बताए ।
प्रदेश सरकारले भने एउटै योजनामा दुई वटा सरकारको थोरै–थोरै बजेट लगाउनुभन्दा एउटै सरकारले सम्पन्न गर्ने गरी काम गर्ने इच्छा देखाएको श्रेष्ठको भनाइ छ ।
कहाँ–कहाँ जोडिन्छ चक्रपथ ?
गोलपार्कबाट सुरु हुने चक्रपथ पुरातात्विक सहरका रुपमा संरक्षण भइरहेको पारी बुटवल हुँदै ऐतिहासिक मणिमुकुन्द सेन उद्यान क्षेत्र, जितगढी हुँदै चुरेको फेँदीबाट जबई मैदानसम्म पुग्ने छ ।
गोलपार्क पुलचोकमा नयाँ पक्की पुल निर्माण कार्य पूरा भइसकेको छ भने त्यसबीचमा पर्ने विभिन्न ठाउँमा कल्भर्ट निर्माण भइसकेका छन् । जबई मैदानलाई बुटवलले प्रदेश सरकारको सहकार्यमा अन्तर्राष्ट्रिय स्तरको स्टेडियम बनाइरहेको छ ।
जबई खेल मैदानमा पुगेको चक्रपथलाई मिलनपार्क हुँदै बुटवल ग्लोबल पीसपार्कसम्म पुर्‍याइने छ । यी दुवै यहाँका शान्ति र मनोरञ्जनका महत्वपूर्ण क्षेत्रका रुपमा विकास भएका पार्कहरु हुन् । मिलन पार्कलाई उपमहानगरकै नमूना पार्क बनाउने गरी काम भइरहेको वडा नं. १२ का अध्यक्ष दुर्गा सुवेदी बताउँछन् ।
पिसपार्कबाट अगाडि बढेको सडक सोइलहार, सैनामैना नगरपालिकाको सिमाना कर्साघाट हुँदै रतनपुर, डहरगाउँबाट ऐतिहासिक नरैनापुर धाम क्षेत्रमा पुग्ने छ । कर्साघाटमा पुल निर्माणको काम चलिरहेको छ भने सोही ठाउँमा बुटवल उपमहानगर र सैनामैनालाई जोडेर केन्द्रीय स्तरको कृषि उपज केन्द्र बनाउने तयारी स्वरुप डीपीआर बनिरहेको छ ।नरैनापुरलाई बुद्धबलीको (बुद्ध खेल्ने, डुल्ने र हिँड्ने ठाउँ) महत्वपूर्ण ठाउँ र पशुपतिनाथ भन्दा पनि पुरानो धामका रुपमा लिइन्छ । यहाँ धाममा अध्ययन केन्द्रसहितको भ्यूटावर बनाउने र त्यसलाई सिमसार क्षेत्र कपरकट्टी ताल (प्रस्तावित बैठौलियाको नरेश्वर ताल)सम्म जोडेर गुरुयोजना बनिरहेको उपमहानगरका प्रवक्ता रामप्रसाद रेग्मीको भनाइ छ ।
चक्रपथ नरेनापुर धाम र कपरकट्टी ताल हुँदै त्यहाँका पुराना बस्ती केदली डाँडा, हिरा चोक हुँदै फर्साटिकर रोडमा जोडिने छ । फर्साटिकर रोड बुटवल–बेलबास–बेथरी सडकमा जोडिएको विमानस्थल र लुम्बिनी जाने वाइपास सडक हो । यही सडक वडा नं. १३ को नुवाकोट गढी प्रवेशद्वार हुँदै अगाडि बढेको १३ का अध्यक्ष नारायणप्रसाद पुनले जानकारी दिए ।
बस्तीमा सार्वजनिक यातायात पुर्‍याउने र त्यसका माध्यमबाट कृषि उपजको बजार विस्तार, बुटवलको भिडभाडलाई कम गर्ने विश्राम स्थलका रुपमा विकास गर्नका लागि चक्रपथ निर्माण गरिएको छ ।
फर्साटिकर रोडमा जोडिएको चक्रपथलाई बाझापुर, विनायकपुर, भाटा, मनोहरापुर, सातकुला हुँदै मोतिपुर चोकमा लगिएको छ । मोतिपुर पुरानो बस्ती र खेतीयोग्य क्षेत्र भएको ठाउँ हो । मोतिपुरदेखि झण्डापुर, हरिहरपुर, रानीगञ्ज हुँदै योगिकुटीको तिलोत्तमा घाट (मगरघाट) मा जोडिने छ । तिलोत्तमा घाटमा पुल निर्माण कार्य सम्पन्न भइसकेको छ ।
यहाँबाट योगीकुटी चोक हुँदै रामनगर पुगेको चक्रपथलाई आम्दा अस्पताल, शिवनगर वन क्षेत्रबाट हिलपार्क गेटसम्म पुर्‍याइएको छ । हिलपार्कलाई बुटवलले बुद्धपार्कका रुपमा विकास गरिरहेको छ । यहाँ विशाल बुद्धमूर्ति सहितको ध्यानकेन्द्र बनाउने तयारीस्वरुप डीपीआर बनाउने काम चलिरहेको प्रमुख प्रशासकीय अधिकृत चक्रपाणी शर्माले अनलाइनखबरलाई बताए ।
हिलपार्क जोड्दै अगाडि बढेको सडकले चन्द्रनगर, आदर्शनगर र लक्ष्मीनगर पनि जोड्ने छ । लक्ष्मीपार्कलाई गुरुयोजनासहित उच्च स्थानको विशेष पार्कका रुपमा विकास गर्न लागिएको छ ।
२ अर्ब ४३ करोडको नगर यातायात गुरुयोजना
बुटवल उपमहानगरले नगर यातायात गुरुयोजना नै निर्माण गरेर चक्रपथ बनाउन बजेट छुटाएको छ । हालसम्म ग्राभेल र पीचसमेत गरी करिब पाँच करोड बराबरको काम भइसकेको छ । यसमा जनसहभागितासमेत जोडिएको छ ।
चक्रपथ र पैदल मार्गको प्राविधिक अध्ययन तथा परामर्शको काम नेष्ट र इकोकोड नामका कम्पनीका प्राविधिकहरुको सहकार्यमा भएको थियो ।
गुरुयोजनाका लागि २ अर्ब ४३ करोड ३४ लाख रुपैयाँ खर्च लाग्ने अनुमान गरिएको छ । यसमा बसपार्कदेखि विश्राम स्थल र ग्यारेजसम्मको योजना छ । एक वर्ष लगाएर यो नगर गुरुयोजना बनेको थियो ।
उपमहानगरपालिकाले दुई वर्षदेखि चक्रपथ निर्माणका लागि बजेट छुट्याएर सडक निर्माणलाई तीव्रता दिएको छ । अबको कम्तिमा छ महिनामा धेरै स्थानमा नगर माइक्रो बस सञ्चालन गर्न मिल्ने गरी सडक निर्माणको काम अगाडि बढेको छ ।
See the source image
अघिल्लो आर्थिक वर्षमा उपमहानगरले एक करोड बजेट छुट्याएर सडक निर्माण गरेको थियो । चालु वर्ष उपमहानगरले वडा नम्बर १२ र १३ मोतीपुर सेमलार क्षेत्रका लागि दुई करोड रुपैयाँ चक्रपथका लागि छुट्टाएको थियो । यसको काम अहिले भइरहेको छ ।
यसैगरी प्रदेश सरकारले बुटवल वडा नम्बर ११ र १३ का लागि ५० लाख रुपैयाँ बजेट छुटाएको थियो ।
उपमहानगरभित्र एक सय ९३ सडक रहेको र अधिकांश कालोपत्रे भइसकेको योजना अनुगमन तथा मूल्यांकन महाशाखाका प्रमुख शिवनारायण साहले जानकारी दिए ।

No comments:

Post a Comment